काठमाण्डौ, २९ मंसिर । नेकपा एमालेको ११औँ राष्ट्रिय महाधिवेशनमा लुम्बिनी प्रदेश भूगोलबाट घनश्याम पाण्डेले केन्द्रीय सदस्य पदमा उम्मेदवारी दिएका छन्। यसअघि पनि केन्द्रीय सदस्यको जिम्मेवारी सफलतापूर्वक सम्हालिसकेका पाण्डे पार्टीभित्र अनुभवी, ऊर्जाशील र संगठनात्मक रूपमा सशक्त नेताका रूपमा चिनिन्छन्।
२३ वर्षकै उमेरमा २०५४ सालमा तत्कालीन तुलसीपुर उपमहानगरपालिकाको उपमेयर बनेका पाण्डे २०७४ सालमा तुलसीपुर उपमहानगरपालिकाको मेयरमा निर्वाचित हुँदै स्थानीय शासनमा प्रभावशाली नेतृत्व प्रदान गरेका थिए। स्थानीय विकास, सुशासन र जनमुखी सेवामा उनले देखाएको सक्रियताले उनी जनप्रिय नेताका रूपमा स्थापित छन्।
राजनीतिसँगै सामाजिक क्षेत्रमा समेत सशक्त उपस्थिति बनाएका पाण्डे सामुदायिक वन महासंघ नेपालको केन्द्रीय अध्यक्ष हुँदै विश्व सामुदायिक वन महासंघको अध्यक्षसमेत भई अन्तर्राष्ट्रिय स्तरमा नेतृत्वदायी भूमिका निर्वाह गरिसकेका व्यक्ति हुन्। वातावरण, वन संरक्षण र सामुदायिक अधिकारका सवालमा उनको योगदान उल्लेखनीय मानिन्छ।
हाल पार्टीले उनलाई युरोप–अमेरिका प्रवास विभागको संयोजकको जिम्मेवारी दिएर सक्रिय रूपमा खटाएको छ। संगठन विस्तार, प्रवासी नेपालीसँगको सम्बन्ध सुदृढीकरण र पार्टी नीतिको अन्तर्राष्ट्रिय प्रवर्द्धनमा उनी प्रभावकारी रूपमा लागिरहेका छन्।
भोलि हुने निर्वाचनमा नेकपा एमालेका अध्यक्ष केपी शर्मा ओलीको प्यानलबाट केन्द्रीय सदस्यमा उम्मेदवारी दिएका पाण्डेलाई अनुभव, कार्यक्षमता र निरन्तरताको बलियो दाबेदारका रूपमा हेरिएको छ। महाधिवेशन प्रतिनिधिहरूमाझ उनको उम्मेदवारीले व्यापक चासो र समर्थन बटुल्ने अपेक्षा गरिएको छ।
आज दिउँसो ३ बजेपछि उम्मेदवारी दर्ताको समय तोकिएको थियो । अध्यक्षमा केपी शर्मा ओली र इश्वार पोख्रेलको उम्मेदवारी परेको छ ।महासचिवमा शंकर पोखरेल र सुरेन्द्र पाण्डेको उम्मेदवारी परेको छ । एमालेमा १९ पदाधिकारी र ३०१ केन्द्रीय सदस्यका लागि निर्वाचन हुँदैछ । आज नै उम्मेदवारको सूची सार्वजनिक गर्ने कार्यक्रम रहेको छ ।
